#OurIrinjalakuda

!!WINNERS ANNOUNCEMENT!! Photography Competition – Celebrate Vidhyarambham with TalentShare & Our Irinjalakuda

Posted on

vidhyarambham 18 Oct 2018 - winners_InPixio

ഒരു ഫോട്ടോഗ്രാഫർ എന്ന നിലയിൽ ഞാൻ ഉറച്ചു വിശ്വസിക്കുന്ന ഒരു കാര്യം ഉണ്ട്. നമ്മൾ എടുക്കുന്ന ഓരോ ചിത്രങ്ങളും ഒരു ചരിത്ര സ്മാരകമാണ്. കാരണം, ആ നിമിഷത്തിന്റെ പ്രത്യേകതകൾ പിന്നീട് ഒരിക്കലും പുനര്ജീവിപ്പിക്കാൻ പറ്റില്ല എന്നുള്ളതാണ്. ആ ചിത്രത്തിലെ കഥാപാത്രങ്ങളുടെ ഭാവം, ആ സമയത്തെ വെളിച്ചം, കാറ്റിന്റെ ഗതി, അങ്ങനെ പല സംഗതികൾ അറിഞ്ഞും അറിയാതെയും ആ ഒരു നിമിഷത്തിൽ ആ ചിത്രത്തിൽ പതിഞ്ഞിട്ടുണ്ടാവും.

അങ്ങനെ ഒരു ചിത്രത്തെയും, ചിത്രകാരനെയും, കഥാപാത്രങ്ങളെയും ആണ് ഈ മത്സരത്തിൽ ഞങ്ങൾ വിജയിയായി തിരഞ്ഞെടുത്തിരിക്കുന്നത്.

3 Rajeev Mullappillyപക്ഷേ… ആ ചിത്രം പകർത്തിയതാരാണെന്നോ, ആ ചിത്രത്തിൽ ഉള്ളവർ ആരാണെന്നോ, ആ ചിത്രം ഈ വിദ്യാരംഭ ദിവസ്സം നമ്മുക്കായി പങ്കു വച്ച രാജീവേട്ടന് അറിയില്ല… അവർ – ചിത്രത്തിൽ ഉള്ളവർ , ചിത്രം എടുത്ത ഫോട്ടോഗ്രാഫർ എന്നിവർ ഞങ്ങളുമായി ബന്ധപ്പെടുക..

വിദ്യാധനം സർവ്വധനാൽ പ്രധാനം എന്നാണല്ലോ പറയുക.

അപ്പോൾ വിജയികൾക്കായി ഞങ്ങൾ ഒരു സുവർണ അവസ്സരം കൂടി നൽകുന്നു. അടുത്ത മാസം “നമ്മുടെ ഇരിങ്ങാലക്കുട” കൂട്ടായ്മയുടെ നേതൃത്വത്തിൽ നടക്കുന്ന പുസ്തക വിതരണത്തിന്റെ ഉത്ഘാടന ചടങ്ങിൽ വിശിഷ്ടാധിതികളുമായി ഒത്തു ചേർന്ന്, റോഡ് സുരക്ഷാ നിർദേശങ്ങൾ അടങ്ങിയ കുറിപ്പ് പുസ്തകത്തിന്റെ പ്രഥമ വിതരണം, നമ്മുടെ ഈ മത്സരത്തിലെ ഫോട്ടോയിൽ ഉള്ള കുട്ടികൾ, സ്കൂൾ കുട്ടികൾക്കായി നടത്തുന്നതായിരിക്കും.

റോഡ് സുരക്ഷയുടെ വിദ്യാരംഭം കൂടി അവരുടെ മനസ്സുകളിലും ജീവിതത്തിലും കുറിക്കാൻ ഉള്ള അവസ്സരം ആവട്ടെ ആ ചടങ്ങു്.

ആ ചടങ്ങിനെപറ്റിയുള്ള കൂടുതൽ വിവരങ്ങൾ അടുത്ത് തന്നെ അറിയിക്കുന്നതാണ്.

4 Abhilash Pudukad.jpg

രണ്ടാം സ്ഥാനം നേടിയ ചിത്രം പങ്കു വച്ചതു: അഭിലാഷ് പുതുക്കാട്, അബു ദാബി.

1 Sarath Pothani.jpg

മൂന്നാം സ്ഥാനം നേടിയ ചിത്രം പങ്കു വച്ചതു: ശരത് പോത്താനി.

ഈ മൂന്ന് പേർക്കും വിജയാശംസകൾ നേർന്നുകൊള്ളുകയും അതോടൊപ്പം തന്നെ സമ്മാനദാനം മേല്പറഞ്ഞ പരിപാടിയോടൊപ്പം നൽകുന്നതായിരിക്കും എന്നറിയിച്ചു കൊള്ളുന്നു.

എല്ലാവർക്കും നന്മ നേർന്നു കൊണ്ട് , “നമ്മുടെ ഇരിങ്ങാലക്കുട” ക്കു വേണ്ടി രമേശ് മേനോൻ

ഒരു വിഷുക്കാലം കൂടി !

Posted on Updated on

ഇരിങ്ങാലക്കുട വളരുന്നു!!! അതെ നമ്മുടെ ഇരിങ്ങാലക്കുട വളരുന്നു!!! ഇനിയും സംശയമോ?
പുതിയ ഹൈപ്പർമാർക്കറ്റുകൾ , സിനിമ തിയറ്ററുകൾ – ഓരോന്നായി അങ്ങനെ വരുന്നു!.
വളരെ സന്തോഷം. അടുത്തവരവിൽ – ചെറിയ ചെറിയ ഷോപ്പിംഗ് കാര്യങ്ങൾ എല്ലാം തിടുക്കത്തിൽ കഴിക്കാൻ ഉള്ള ഒരു ഇടം കൂടി നമുക്കായി തുറന്നു കിട്ടിയിരിക്കുന്നു!.
കുറച്ചു മാറി ചിന്തിച്ചാൽ – മനസ്സ് കൊണ്ടും, ദൂരം കൊണ്ടും – നമ്മുടെ ഇരിങ്ങാലക്കുടയിൽ വളരെ നല്ല നിലയിൽ നടന്നിരുന്ന ഒരു കച്ചവട പാരമ്പര്യവും, പ്രതിവാര ചടങ്ങും ഉണ്ടായിരുന്നു. – “ഇരിങ്ങാലക്കുടയിലെ  ചന്ത”.
എല്ലാ ആഴ്ചകളിലും കാലത്തു നാല് മണിക്ക് മുൻപേ അങ്ങോട്ട് നിര നിരയായി നീങ്ങി കൊണ്ടിരുന്ന കാള വണ്ടികളെയും കർഷകരെയും ഓർമ്മ വരുന്നു. ഇന്ന് അതെല്ലാം ഓര്മ മാത്രം. അതിരാവിലെ പോകുന്ന ആ വണ്ടിക്കാളകളുടെ മണികിലുക്കവും, അടിയിൽ തൂക്കിയിട്ടിരുന്ന റാന്തൽ വെളിച്ചത്തിന്റെയും ഓർമ്മകൾ കെട്ടടങ്ങിയിട്ടുണ്ടാവും ഒരു പക്ഷെ എല്ലാവരുടെയും മനസ്സിൽ നിന്ന്.
അവിടെ പോയി വില പേശി വാങ്ങിക്കുന്ന ആ സുഖവും, ആ കർഷകരും കച്ചവടക്കാരുടെ നടത്തിയിരുന്ന വ്യക്തിപരമായ ഇടപാടുകളും  എങ്ങോ പോയിരിക്കുന്നു. കയ്യിൽ കരുതിയിരിക്കുന്ന ക്രത്യമായി കണക്കുള്ള  പണത്തിനു താഴെ, ആവശ്യത്തിന് മാത്രം വാങ്ങി വന്നിരുന്ന ആ വാണിഭ പ്രക്രിയ ഇന്നത്തെ തലമുറ വീണ്ടും അനുഭവിക്കണം. അവിടെ കൊണ്ട് പോയി കാർഷിക വിളകൾ കച്ചവടക്കാരും ലേലക്കാരും ആയി വിലപേശി വാങ്ങുകയും വിൽക്കുകയും ചെയ്യുന്ന ആ സുഖം അവർക്കു കാണിച്ചു കൊടുക്കുവാനും അനുഭവിക്കാനും പ്രാവർത്തികമാക്കാനും ഒരു അവസ്സരം നൽകേണ്ട കടമ നമുക്കില്ലേ!
ഇന്ന് ഇങ്ങനെ പുതുതായി വന്നു കൊണ്ടിരിക്കുന്ന വലിയ വ്യാപാര സ്ഥാപനങ്ങളിൽ പോയി ക്രെഡിറ്റ് കാർഡും കൊടുത്തു, ആവശ്യത്തിലും അധികം സാധനങ്ങൾ ട്രോളിയിൽ നിറച്ചു വീട്ടിലേക്ക് തിരിച്ചു വന്നു അവയിൽ ഒരു വലിയ പകുതിയും തുറന്നു പോലും നോക്കാതെ കളയുന്ന ഒരു ജനതയെ നമ്മൾ പ്രോത്സാഹിക്കുന്നു.
വൈകിയെത്തുന്ന ചില കാളവണ്ടികളും അതിന്റെ പിന്നിൽ സ്കൂൾ ബാഗുകൾ തൂക്കിയിട്ടു തൂക്കിയിട്ടു  സ്കൂളിലേക്ക് നടന്നു പോയിരുന്നു ആ പഴയ കാലവും പെട്ടെന്ന് ഓര്മയിൽ എത്തിയപ്പോൾ എഴുതി എന്ന് മാത്രം. അവരുടെ മൂളി പാട്ടുകളും കഥകളും കൂടെ മിന്നി മറഞ്ഞു.
നമ്മുടെ ഇരിങ്ങാലക്കുട നമ്മുടെ സ്വന്തം ഇരിങ്ങാലക്കുടയിലെ തനതായ പാരമ്പര്യങ്ങൾ കൂടി വളരാൻ ഉള്ള ശ്രമങ്ങൾ കൂടി ഇതോടോപ്പോം ചെയ്യും എന്ന് കരുതട്ടെ.
എല്ലാ സുഹൃത്തുക്കൾക്കും എന്റെ വിഷു ആശംസകൾ. ഇത്തവണത്തെ വിഷു ഷോപ്പിംഗ് ഇരിങ്ങാലക്കുട ചന്തയിൽ നിന്നാവട്ടെ.
രമേശ് മേനോൻ